बिपी राजमार्ग दसैँअघि सञ्चालन नहुने

सरकारले बाढी पहिरोका कारण क्षतिग्रस्त देशभरका सडक खुलाउने सम्बन्धमा कार्ययोजना प्रस्तुत गरेको छ । बिहीबार भौतिक पूर्वाधार तथा यातायात मन्त्रालयमा पत्रकार सम्मेलन आयोजना गर्दै देशभरका राजमार्गमा भएका अवरोध एवं त्यसलाई खुलाएर यातायात सञ्चालनलाई सुचारु बनाउनेबारे कार्ययोजना प्रस्तुत गरेको हो ।

मन्त्रालयले बिपी राजमार्ग दसैँ अघि सञ्चालनमा ल्याउन नसकिने प्रष्ट पारेको छ । मन्त्रालयका सचिव शर्माकाअनुसार तत्काल अस्थायी रूपमा मात्रै सञ्चालनमा ल्याउन सकिने देखिएको आयोजित पत्रकार सम्मेलनमा जानकारी दिइयो ।

उक्त राजमार्ग चौकीडाँडा–कालढुंगा सडक खण्ड १८ किलोमिटर सडकमध्ये करिब १२ किलोमिटरसडक पूर्णरुपमा बगेका कारण यो सडक तत्काल मर्मत गर्न नसकिने देखिएको छ ।बाटो अवरुद्ध हुँदाबीचबीचमा सवारी साधनहरु रोकिएका छन् । यी सवारीसाधनलाई गन्तव्यमा पुर्याउने गरी मात्रै काम अघि बढिरहेको सचिव शर्माले बताए ।

‘यो खण्डमा दुवै तर्फबाट पहिरो सफा गर्ने कार्य भइरहेको छ । रोशी खोलाको पानीको बहावलाई मध्यनजर गरी सम्भव भएसम्मका सबै विकल्प प्रयोग गरी अस्थायी रूपमा यातायात सञ्चालन गरिने तयारी गरिएको छ,’ सचिव शर्माले भने ।

बाढी तथा पहिरोले राजमार्ग क्षतिग्रस्त भएपछि पूर्वबाट आउने गाडीहरू बिपी राजमार्गमा सित्खासम्म आउने र पुल तरेर रामेछापको मन्थली र दोलखाको चरिकोट भएर काठमाडौँ आउने विकल्प खोजिएको थियो । सित्खाबाट मध्यपहाडी राजमार्गबाट दोलालघाट आउने र अरनिको राजमार्गबाट काठमाडौँ आउने रुट तुलनात्मक रूपमा छोटो पर्ने देखिएको शर्माले बताए ।

त्यस्तै, पूर्व जाने गाडीहरूका लागि कान्ति राजपथ रदक्षिणकाली छैमले सडक विकल्प रहेको उनले बताए । भौतिक पूर्वाधार सचिव शर्माले भने, ‘यो बाटोबाट हेटौंडा र त्यहाँबाट मकवानपुरको भिमान पुग्न सकिन्छ । सिन्धुली उक्लिएर अन्यत्र जाँदा भयो ।’ भोलि वा पर्सिसम्म कान्ति राजपथ र दक्षिणकाली छैमले सडक सञ्चालन गर्ने प्रयासका साथ काम भइरहेको उनले बताए ।

काठमाडौँबाट नौबिसे हुँदै हेटौंडा जाने बाइरोडको बाटो अहिले सञ्चालनमा छ । त्यस्तै थानकोट –चित्लाङ भएर पनि हेटौंडा जोड्ने सडकमा समेत अवरोध नरहेको मन्त्रालयले जनाएको छ ।