उर्मिला सापकोटा स्मृति डाँडापारी पत्रकारिता पुरस्कार २०८१ अधिकारीलाई [तस्बिरहरू]

बनेपा । उर्मिला सापकोटा स्मृति डाँडापारी पत्रकारिता पुरस्कार–२०८१ पलाञ्चोक साप्ताहिकका प्रधानसम्पादक शुभराज अधिकारीलाई प्रदान गरिएको छ।

पत्रकारिता क्षेत्रमार्फत डाँडापारी क्षेत्रका चुनौती र सम्भावना उजागर गरेर त्यहाँको विकासमा भुमिका खेलेबापत नेपाल प्रेस युनियन काभ्रेपलाञ्चोक शाखाले उनलाई सम्मान गरेको हो । बेथानचोक गाउँपालिकाका अध्यक्ष भगवान अधिकारीले उनलाई ५ हजार ५ सय ५५ रुपैयाँसहित दोसल्ला र सम्मानपत्र प्रदान गरेका हुन्।

२०६६ साल फागुन १५ गते घरबाट ललितपुरको गोटिखेलस्थित क्याम्पस अध्ययन गर्न जाने क्रममा सवारी दुर्घटनामा परी उर्मिला सापकोटाको निधन भएको थियो। उनको स्मृतिमा बाबु गोपालकृष्णले १ लाख राशीको अक्षयकोष स्थापना गरेका थिए । प्राप्त व्याजबाट हरेक बर्ष एक जना पत्रकारलाई पुरस्कृत गरिदै आएको छ । पुरस्कारबाट हालसम्म जिल्लामा कृयाशील १३ जना पत्रकार सम्मानित भइसकेका छन्।

बेथानचोक गाउँपालिका अध्यक्ष भगगवान अधिकारीले पत्रकारिता पुरस्कार स्थापनाले बेथानचोकको च्याम्राङवेशी क्षेत्रको समस्या उजागर हुने र त्यसले विकासमा योगदान दिने विचार व्यक्त गरे।

बेथानचोक गाउँपालिकाका प्रवक्ता एवं वडा नं १ का अध्यक्ष समेत रहेका नेपाल प्रेस युनियन काभ्रेका पूर्व सचिव मधुसुदन तिमल्सिनाले सञ्चार क्षेत्रले खेलेको भूमिकाको प्रशंसा गर्दै आगामी दिनमा पनि यसको निरन्तरता अपेक्षा गरे।

नेपाल प्रेस युनियन काभ्रेका सल्लाहकार एवं नेपाल पत्रकार महासंघ काभ्रेपलाञ्चोकका पूर्वअध्यक्षहरु इश्वरी ओझा, महेशराज पौडेल, बद्रिराज तिमल्सिना, नेपाल प्रेस युनियनका केन्द्रीय सदस्य कपिल कोइराला, नेपाल पत्रकार महासंघ बाग्मती प्रदेश समितिका सदस्य सुनिता सापकोटा, नेपाल प्रेस युनियन काभ्रेपलाञ्चोकका अध्यक्ष नगेन्द्र अधिकारी, पुरस्कृत सञ्चारकर्मी शुभराज अधिकारी, सहसचिव इन्द्रबहादुर थापा, कोषाध्यक्ष सरोज अधिकारी लगायतले छोरी गुमाउँदाको शोकलाई शक्तिमा बदलेर गोपालकृष्ण सापकोटा र परिवारले स्थापना गरेको पत्रकारिता पुरस्कारले त्यो क्षेत्रको समस्या र सम्भावना उजागर गर्न मद्दत गरेको बताए।

स्व. उर्मिलाका बाबु गोपालकृष्णले डाँडापारी क्षेत्रका समाचार लेख्ने पत्रकारलाई पुरस्कृत गर्ने गरी खुल्ला आवेदन गरेर पुरस्कार निर्णय भएकोमा खुशी लागेको र आफ्नो गाउँमा नै आएर कार्यक्रम गरेकोमा युनियन प्रति आभार प्रकट गर्दै आगामी दिनमा डाँडापारी क्षेत्रका समस्या अझै सञ्चारमाध्यममा आउने अपेक्षा गरे।

सोही अवसर युनियनले वडा नं १ स्थित भैरब माध्यमिक विद्यालयलाई स्टेशनरी, पुस्तक, खेलकुदका सामाग्रीहरु हस्तान्तरण गरेको छ। नवप्रभात पुस्तक भण्डार, न्यू प्रगति पुस्तक पसल, द राइजिङ बुक्स एवं जनरल सप्लार्यस्बाट प्राप्त सहयोग युनियनको समन्वयमा विद्यालयलाई हस्तान्तरण गरिएको हो।

पुरस्कृत सञ्चारकर्मी शुभराज अधिकारीले पुरस्कार रकम ५ हजार ५ सय ५५ रुपैयाँ सोही बराबर रकम थप गरी ११ हजार १ सय १० रुपैयाँ विद्यालयमा थप स्टेशनरी र अन्य सामाग्री हस्तान्तरणको लागि विद्यायलका प्रधानाध्यापक ओमप्रसाद तिमल्सिनालाई हस्तान्तरण गरेका थिए ।