काभ्रेमा सफल हुँदै कृषि उत्पादनमा स्वनिर्भर वडा निर्माण अभियान

धुलिखेल । बागमती प्रदेश सरकारले अत्यन्तै महत्त्वकासाथ ल्याएको कृषि उत्पादनमा स्वनिर्भर वडा निर्माण अभियान ‘समुदायमा आधारित एक वडा, एक कृषि उत्पादन कार्यक्रम’ ले सार्थकता पाइरहेको छ । कृषि विकास कार्यालय काभ्रेपलाञ्चोकमार्फत ११ वटा कार्यक्रमहरु यस वर्ष रहेकोमा हालसम्म ७ वटा सम्झौता भई काम थालनी भइसकेका छन् भने बाँकी कार्यान्वयनको क्रममा रहेका छन् ।

महभारत वडा नं ५ र खानीखोला वडा नं २ मा कफी खेती कार्यक्रम लागू भइसकेको छ भने बेथानचोक वडा नं २ मा तरकारी खेतीका लागि बुधबारबाट यो कार्यक्रममा सम्झौता भएको छ । सम्झौतामा बेथानचोक गाउँपालिकाकातर्फबाट प्रशासकीय अधिकृत विश्वनाथ दाहाल, वडा नं २ का अध्यक्ष पुरुषोत्तम तिमल्सिना, बेथानचोक महाभारत कृषक समूहका तर्फबाट अध्यक्ष भगवान घिमिरे र कार्यालय प्रमुख कुलप्रसाद दवाडीले हस्ताक्षर गरेका छन् । यस्तै, गाउँपालिकातर्फबाट वडा नं २ का वडा सदस्य भरतप्रसाद तिमल्सिना र कृषि शाखा प्रमुख मधुसूदन दाहालले साक्षीमा हस्ताक्षर गरेका छन् ।

प्रदेश सरकारले कृषि विकास कार्यालयमार्फत पहिलो पटकका लागि बेथानचोक–२ का लागि ६६ लाख ९९ हजार १९६ रुपैंया बराबरको कार्यक्रम सञ्चालन गर्दैछ । यसमा गाउँपालिकाले २० प्रतिशत अर्थात् १३ लाख ३३ हजार ३४० रुपैँया ब्यहोरेको छ भने बाँकी २० प्रतिशत अर्थात् १३ लाख ६९ हजार ८३९ रुपैँया समूहले योगदान गर्ने प्रतिबद्धता जनाइसकेको छ । गाउँपालिकाले ब्यहोर्ने रकमबापतको १३ लाख ३३ हजार ३४० रुपैंया प्रदेश कोष तथा लेखा नियन्त्रण कार्यालयमा जम्मा भइसकेको छ

कार्यविधिअनुसार बेथानचोक वडा नं २ तथा बेथानचोक महाभारत कृषक समूहसँग अधिकतम पाँच वर्षसम्म कार्यक्रम सञ्चालन गर्न सकिने उल्लेख छ । यसका लागि समूहले पाँच वर्षसम्मको कार्यक्रम र कार्ययोजनाहरु तयार गरि सकेको अध्यक्ष भगवान घिमिरेले जानकारी दिए । हाललाई तरकारी उत्पादन प्रविधिमा आधारित क्रियाकलापहरु बाँस र फलामका प्लाष्टिक हाउस निर्माण, उन्नत बीउ बिजन, मलखाद, स्थलगत तालिमहरुलगायतका क्रियाकलापहरु समावेश रहेको भए पनि आगामी वर्षहरुमा बजारीकरण, भण्डारणलगायतका थप क्रियाकलापहरुमा जोड दिइने उल्लेख छ ।

गत असोजको बाढीपहिरोको क्षतिले आक्रान्त भएको समुदाय, समग्र वडालाई समेटेर किसान आवद्ध रहेको समूह, उर्वर भूमि, नवीनतम प्रविधिको उपलब्धता, सडकको पहुँच र बजारको सुनिश्चित भएकाले बेथानचोक वडा नं २ मा आगामी पाँच वर्षसम्म सञ्चालन हुने ‘समुदायमा आधारित एक वडा, एक कृषि उत्पादन कार्यक्रम’ ले पालिकाको चिनारीमा थप योगदान गर्ने वडाध्यक्ष तिमल्सिनाले दाबी गरे ।