सामुदायिक साकोस बागमती प्रदेशकै उत्कृष्ट

पनौती । काभ्रेपलाञ्चोककाे पनौती–४ मा रहेको सामुदायिक बचत तथा ऋण सहकारी संस्था प्रदेशकै उत्कृष्ट घोषित भएको छ।

६८ औं राष्ट्रिय सहकारी दिवसको अवसरमा भूमि ब्यवस्था, सहकारी तथा गरिबी निवारण मन्त्रालय र राष्ट्रिय सहकारी महासंघको आयोजनामा राष्ट्रिय सभागृह काठमाण्डौंमा भएको सहकारी दिवस कार्यक्रम मिति २०८१ चैत्र २० गते बागमति प्रदेशका सहकारी संस्थाहरु मध्येबाट उत्कृष्ट सहकारी ब्यवसाय पुरस्कार प्राप्त गर्ने घोषणा भएको छ।

कार्यवाहक प्रधानमन्त्री प्रकाशमान सिंहको प्रमुख आतिथ्यतामा भएको कार्यक्रममा नेपालका सातै प्रदेशबाट सात वटा सहकारी संस्थाहरुलाई यस वर्षको उत्कृष्ट संस्थाको सम्मान प्रदान गर्ने घोषणा भएको हो। जसमध्ये बागमति प्रदेशबाट सामुदायिक बचत तथा ऋण सहकारी संस्था लि। छनौट भएको छ । २०५१ साल माघ १४ गते स्थापना भएको संस्थाले यस अघि २०६५ सालमा राष्ट्रिय सहकारी महासंघबाट उत्कृष्ट सहकारी ब्यवसाय पुरस्कार, २०६८ सालमा नेफ्स्कुनबाट उत्कृष्ठ सहकारी संस्था र उत्कृष्ठ ब्यवस्थापक पुरस्कार पाएको थियो।

त्यस्तै २०७३ सालमा राष्ट्रिय सहकारी बैंक लि। बाट प्रदेशको उत्कृष्ठ संस्था, २०७५ सालमा नेफ्स्कुनबाट उत्कृष्ठ ब्यवस्थापक, २०७६ सालमा बागमति प्रदेश सरकारबाट प्रदेशको उत्कृष्ठ संस्था, २०७८ सालमा बागमति प्रदेश बचत तथा ऋण सहकारी संस्थाबाट उत्कृष्ठ संस्था, २०८० सालमा जिल्ला सहकारी संघ, काभ्रे र पनौतीबाट उत्कृष्ट संस्थाको रुपमा पुरस्कृत भइसकेको छ।

एशियाली ऋण महासंघबाट सञ्चालित अन्तर्राष्ट्रिय स्तरको एक्सेस कार्यक्रममा आबद्ध भई सन् २०१२ देखि २०२२ सम्म निरन्तर एशियाली स्तरको एक्सेस ब्राण्ड प्राप्त गर्न सफल यस संस्थामा हाल ६० हजार ६ सय ६२ जना शेयर सदस्यहरु आबद्ध छन्।

संस्थामा ६ अर्ब २२ करोड रुपैयाँ बराबरको कुल पुँजी रहेको छ। सदस्यहरुको शेयर पुँजी ५२ करोड ४ लाख, जगेडा कोष ४२ करोड ९७ लाख रहेको छ भने सदस्यहरुबाट ४ अर्ब ५२ करोड निक्षेप संकलन गरी सदस्यहरुलाई नै ४ अर्ब ४५ करोड ऋण लगानी गरेको छ।

१ सय ३४ जना कर्मचारीहरुलाई प्रत्यक्ष रोजगारी दिएको संस्थाले १८ वटा सेवाकेन्द्र मार्फत सदस्यहरुलाई सेवा प्रदान गर्दै आएको छ।