काभ्रे जिल्ला व्यापी अन्तर विद्यालय तीज नृत्य प्रतियोगिता’ सम्पन

प्याव्सन काभ्रेसँगको सहकार्यमा विद्यासागर माविको आयोजनामा भएको ‘प्याव्सन काभ्रे जिल्ला व्यापी अन्तर विद्यालय तीज नृत्य प्रतियोगिता’को उपाधी बागमती स्कुल बनेपाले जितेको छ ।
आज बनेपामा सम्पन्न प्रतियोगितामा काभ्रे मावि पनौती दोस्रो र स्प्रिङ हिल स्कुल तेस्रो हुँदा सान्त्वना पुरस्कार नाइटिंगेल इङ्लिस स्कुल बनेपाले प्राप्त गर्‍यो । प्रतियोगितामा १० हजार नगदसहित बेस्ट कोरियोग्राफरको उपाधि निशा कार्कीलाई प्रदान गरियो ।
प्रतियोगितामा काभ्रे जिल्लाभरका ३४ वटा विद्यालयको सहभागिता रहेको थियो । प्रतियोगितामा नृत्य निर्देशक श्याम खड्गी, महेश केसी र सुजिता घिमिरेले निर्णायकको भूमिका निर्वाह गरेका थिए ।
प्रतियोगिताको समापन कार्यक्रम नृत्य निर्देशक कमल राईको प्रमुख आतिथ्यतामा सम्पन्न भएको थियो । प्रतियोगिताको उद्घाटन प्याव्सनका केन्द्रीय उप महासचिव भीमसेन केसीले गरेका थिए ।
कार्यक्रमको उद्घाटन सत्रमा प्याव्सनका केन्द्रीय उपमहासचिव भीमसेन केसी, सचिव एवं आयोजक विद्यालय विद्यासागर अंग्रेजी माविका प्राचार्य हिरा शर्मा नेपाल, कार्यक्रम संयोजक मुक्ति रिजालले मन्तव्य राखेका थिए । कार्यक्रम प्याव्सन काभ्रेका अध्यक्ष श्याम भुजेलको सभापतित्वमा सम्पन्न भएको थियो ।