स्वास्थ मन्त्री पौडेल घाइतेहरुको अवस्था बुझ्न धुलिखेल अस्पतालमा

धुलिखेल / स्वास्थ्य तथा जनसंख्यामन्त्री प्रदिप पौडेलले बाढी पहिरोमा घाइते भइ धुलिखेल अस्पतालमा उपचाररतहरुको स्वास्थ अवस्थाबारे जानकारी लिएका छन् ।

शनिवार दिउसो अस्पताल आएका मन्त्री पौडेलले बाढी पहिरोमा परेर धुलिखेल अस्पतालमा उपचाररत घाइते र आफन्त भेटेर उपचार र व्यवस्थापनबारे जानकारी लिएका हुन् ।

धुलिखेल अस्पतालका प्रशासकीय निर्देशक डा. विराजमान कर्मचार्य, डा. राजेन्द्र कोजू लगायतले त्यहाँ उपचाररत घाइतेको अवस्था र अस्पतालले गरिरहेको प्रयासबारे जानकारी गराएका थिए ।

मन्त्री पौडेलले घाइतेहरुको अवस्था बुझ्न र उपचार कसरी व्यवस्थित गराउन सकिन्छ भन्ने चासोका साथ अस्पताल आएको बताए । उनले बाढी र पहिरोमा परेर घाइते सबैको उपचार निशुल्क गर्ने सरकारले निर्णय गरेको भन्दै यसबारे प्रचार प्रसार गर्नुपर्ने बताए । विपदपछि हुन सक्ने स्वास्थ्यजन्य महामारीको बारेमा सरकार सचेत भएको भन्दै त्यसको तयारी गर्न निर्देशन समेत दिए । विपदको समयमा धुलिखेल अस्पतालले पुर्याएको सेवाको प्रशंसा गर्दै मन्त्री पौडेलले सबैलाई साथमा लिएर अझै उत्कृष्ट सेवा दिन अनुरोध गरे ।

जनस्वास्थ्य कार्यालय काभ्रेका प्रमुख रागिश्री कक्षपति श्रेष्ठले बाढी पहिरो प्रभावित क्षेत्रमा खानेपानी र मरेका पशुपंक्षीको व्यवस्थापनले जटिलता ल्याउन सक्ने भन्दै त्यसको प्रभावकारी व्यवस्थापनमा सबैले सहयोग गर्नुपर्ने बताइन् । काभ्रेका ५ वटा स्वास्थ्य संस्थामा पूर्ण र ५ वटा स्वास्थ्य संस्थामा आंशिक क्षति भएको पनि उनले जानकारी गराइन् ।

डा. विराजका अनुसार, बाढी र पहिरोमा घाइते मध्ये २ जना सघन उपचार कक्षमा, १८ जना विभिन्न वार्डमा उपचाररत छन् ।