महाभारत लेखको आगो नियन्त्रणबाहिर जाँदै

काभ्रेको बेथानचोक र खानीखोला गाउँपालिकाको सिमानामा रहेको महाभारत लेखको थामलेखमा लागेको आगो नियन्त्रणबाहिर जान थालेको छ ।

मंगलबार दिउँसो दुई बजेबाट सुरु भएको आगो तत्काल निभाउन सम्भावना देखिएको छैन । प्रहरी चौकी फलामेटारका प्रहरी सहायक निरीक्षक राम सागर महतोको अनुसार सामुदायिक वनको भिरमा आगो लागेकोले तत्काल निभाउन सकिने अवस्था देखिएको छैन । स्थानीयको सहयोगमा आगो निभाउने पहल भएपनि सम्भावना कम रहेको महतोले बताए । जंगलमा आगो लागेपनि बस्तीमा भने आइनपुगेको प्रहरी सहायक निरीक्षक महत्तोले जानकारी दिए ।
स्थानीय पर्यटन व्यवसायी कमल नेपालले पनि आगलागीले उग्र रुप लिएपछि नियन्त्रण असम्भव जस्तै देखिएको बताए । बेथानचोक नारायणस्थान लगायतका क्षेत्र मा यात्रा गर्न तथा टेन्ट क्याम्पिङ जादै हुनुहुन्छ भने जानकारी लिएर मात्रै जान नेपालले आग्रह गरेका छन् । बेथानचोक गाउँपालिकाका अध्यक्ष भगवान अधिकारीले जिल्ला सुरक्षामा गम्भीरतापूर्वक जानकारी गराईएको बताए । उनले सबै बेथानचोक र खानीखोलाबासीलाई सचेत हुन अनुरोधसमेत गरेका छन् ।तस्बिर : कमल नेपाल