नवलपरासीमा स्थानीय दुई समूहबीच झडप, स्थानीय र प्रहरी गरी १५ जना घाइते

नवलपरासी । नवलपरासीमा मंगलबार दुई समुदायविच भएको झडपमा नेपाल प्रहरी र सशस्त्र गरी १५ प्रहरी घाइते भएका छन्। झडपमा घाइते एक प्रहरीको अवस्था गम्भीर रहेको छ।

नवलपरासीको पाल्हीनन्दन गाउँपालिका–३ बेलासपुरमा मंगलबार स्थानीय युवायुवतीको प्रेम सम्बन्धको विषयमा भएको विवादलाई लिएर झडप भएको थियो।

दुई समूहबीच मंगलबार ढुंगाहानाहान भएपछि प्रहरीले नियन्त्रण गर्नेक्रममा झडप हुँदा ठूलो संख्यामा प्रहरी घाइते भएका हुन्। झडपमा ११ जना नेपाल प्रहरी र ४ जना सशस्त्र प्रहरी घाइते भएका हुन्।

झडप नियन्त्रणका लागि पुगेको इलाका प्रहरी कार्यालय महेशपुरको गाडीमा आक्रोशित समूहले आगजनी गरेका थिए।

झडपको स्थिति नियन्त्रणमा लिन प्रहरीले ५ राउण्ड अश्रुग्यास र ३ राउन्ड हवाइ फायर गरेको छ। अहिले स्थिति सामान्य बनेको प्रहरीले जनाएको छ।