काभ्रेमा एसईईको तयारी पुरा

माध्यामिक शिक्षा परिक्षाको तयारी काभ्रेपलाञ्चोकमा पुरा भएको छ। परिक्षाको तयारी पुरा भएसँगै परिक्षालाई मर्यादित र शान्तिपूर्ण बनाउनका लागि सरोकारवाला निकाय विच अभिमुखीकरण कार्यक्रम आयोजना गरिएको छ ।

शिक्षा विकास तथा समन्वय इकाई काभ्रेपलाञ्चोकले धुलिखेलमा आयोजित एसइई केन्द्राध्यक्षहरुका लागि अभिमुखीकरण कार्यक्रममा सहभागिहरुले एसइईलाई शान्तिपूर्ण र मर्यादित बनाउनका लागि सरोकारवाला सबैले सहयोग गर्नुपर्नेमा जोड दिएका हुन् ।

कार्यक्रममा जिल्ला समन्वय समितिका प्रमुख दिपककुमार गौतमले एसएलसीको समयमा जस्तो पछिल्ला एसइईमा गतिविधि नहुनुमा बिद्यार्थीको सङ्ख्या कम हुनु र आम नागरिकमा परीक्षाको विषयमा सचेतना फैलिएका कारण परीक्षामा हुने गतिविधिमा कमी आएको बताए । परीक्षाको अनुगमन गर्ने क्रममा बाहिरबाट हेर्दा परीक्षा शान्तिपूर्ण र राम्रो देखिएपनि नतिजा कमजोर आउँदा परीक्षाको विषयमा विभिन्न टिकाटिप्पणी हुने गरेको बताए । ‘पछिल्लो समय सामुदायिक बिद्यालयमा नतिजा कमजोर हुँदै गएको गुनासो आईरहेको छ, त्यसको सुधारका लागि सबैले आफ्नो क्षेत्रबाट शिक्षाको स्तर सुधार गर्न लाग्नुपर्छ,—गौतमले भने,–‘एसइईलाई शान्तिपूर्ण र मर्यादित बनाउनका लागि अभिभावक, शिक्षक र बिद्यार्थी सबैको भूमिका अहम हुन्छ ।’

प्रमुख जिल्ला अधिकारी उमेशकुमार ढकालले एसइईलाई मर्यादित बनाउनका लागि अभिभावक, शिक्षक र बिद्यार्थीका साथै समाजको समेत उत्तिकै भूमिका हुने बताए । परीक्षा हलको वातावरणले पनि बिद्यार्थीलाई पढ्ने की नपढ्ने भन्ने विषयको निर्धारण गर्ने उनको भनाई छ । ‘परीक्षामा कडाइ भएको छ भने बिद्यार्थीले भोलिपल्टका परीक्षाका लागि पढेर राम्रो तयारी गर्छन् भने परीक्षा खुकुलो भएको खण्डमा परीक्षामा कडाइ छैन किन दुःख गर्नु भनेर नपढ्ने अवस्था हुन्छ ।’— प्रजिअ ढकालले भने ।

जिल्ला प्रहरी प्रमुख प्रहरी उपरीक्षक बसुन्धरा खड्काले एसइईका लागि जुनियर प्रहरी अधिकृतको नेतृत्वमा प्रहरी परिचालन गरिने बताईन । प्रश्नपत्रको ढुवानी, भण्डारण गर्ने, परीक्षा केन्द्रमा पुर्याउने र परीक्षाको उत्तरपुस्तिकाको सुरक्षा, भण्डारणलगायतको क्षेत्रमा तथा परीक्षामा सुरक्षा दिनका लागि प्रहरी तयारी अवस्थामा रहेको बताईन ।

अभिमुखीकरण कार्यक्रममा शिक्षा समन्वय इकाई प्रमुख देवका ढकालले एसइईलाई मर्यादित बनाउनका लागि कुनै एउटा निकायले मात्रै काम गर्न नसक्ने बताउँदै त्यसका लागि परीक्षासँग सम्बन्धित सबै सरोकारवालाको महत्वपूर्ण भूमिका हुने बताईन ।

यस वर्षको एसइईमा नियमिततर्फ पाँच हजार ७८९ जना र ग्रेड बृद्धिका लागि ६०२ परीक्षार्थी गरी कुल छ हजार ३९१ परीक्षार्थीको लागि जिल्लाभर ३४ परीक्षा केन्द्र तोकिएको छ । गत बर्ष ४० वटा परीक्षा केन्द्र रहे पनि विद्यार्थी संख्याका आधारमा यो पटक ६ वटा केन्द्र घटाएर ३४ कायम भएको शिक्षा समन्वय इकाई प्रमुख देवका ढकालले जानकारी दिईन ।