बुडोल सहकारीको हाजिरीजवाफ प्रतियोगिता सम्पन्न

बुडोल सामुदायिक बचत तथा ऋण सहकारी संस्था लि. ले २६ औं वर्षमा प्रवेश गरेको अवसर पारी माध्यमिक तहका विद्यार्थीहरुको लागि विद्यालयस्तरिय हाजिरीजवाफ प्रतियोगिता सम्पन्न गरेको छ।

११ वटा विद्यालयहरुले सहभागिता जनाएको प्रतियोगिताको छनौट चरणमार्फत ६ वटा विद्यालयहरु अन्तिम चरणमा समावेश भएका थिए।

अन्तिम चरणबाट श्री सर्वमंगला माध्यमिक विद्यालयले प्रथम स्थान, श्री भक्तेश्वर गोसाईंकुण्ड माध्यमिक विद्यालयले द्वितीय स्थान, श्री रत्न चुण्डेश्वर माध्यमिक विद्यालयले तृतीय स्थान र श्री शुभ चामुण्डा माध्यमिक विद्यालयले सान्त्वना स्थान हासिल गरेका थिए।

संस्थाले बिजयी प्रतियोगीहरुलाई २६ औं वार्षिकोत्सव समारोहमा नगद राशि सहित पुरस्कार र प्रमाण पत्र वितरण गर्ने घोषणा गरेको छ।

संस्थाको शिक्षा तथा प्रकाशन उपसमितिको आयोजनामा भएको प्रतियोगिता गायत्री खड्काले संयोजकत्वमा सम्पन्न भएको थियो।

कार्यक्रममा संस्थाका अध्यक्ष कैलाश के.सी.ले प्रमुख अतिथिको रुपमा शुभकामना मन्तव्य राख्दै प्रतियोगितामा सहभागी अन्य सहभागीहरुलाई मायाको चिनो प्रदान गरेका थिए । संस्थाले सञ्चालनको २५ औ वर्ष पुरा गरी २६ औं वर्षमा प्रवेश गरेको सन्दर्भ पारी आगामी माघ १६ गते २६ औं वार्षिकोत्सव समारोहको आयोजना गर्दैछ ।